Veliko Polje, Igman Mountains
جبال إيغمان وبيالاشنيتا (أو الجبل الأبيض) هي من أجمل الجبال في البوسنه، تتميز بطبيعتها الخلابه وبهواها النقي على مستوى أوروبا
الرحله بالسياره من ساراييفو للجبال مدتها 20 دقيقه تقريبا. أول مكان وقفنا فيه كان منتزه بجبال إيغمان اسمه Veliko Polje
المكان عباره عن حديقه كبيره محاوطتها الجبال والغابات وفيها طرق مرصوفه للتمشي وركوب الدراجات الهوائيه، وفيها كراسي خشبيه تحت الأشجار وبعض طاولات Picnic المظلله في وسط المكان…
من بعيد لمحت مبنى ولما سألت السايق قالي إنه فندق…
المكان كان شبه خالي وقتها، بس التمشي فيه وايد حلو وكلما مطرت تظللنا بالشجر
وكان في ثلج منتشر بالمكان ما ذاب ليلحين، بس لفت انتباهنا الطيور اللي تنزل على الثلج وتتسبح فيه! وااي الجو كان حيييل بارد والمطر ينزل صج شي غريب سبحان الله! صورت فيديو قصير لهذا المنظر بعد ما وقف المطر…
بعدها رحنا مكان ثاني في إيغمان أتوقع إسمه Igmanu مثل ماهو مكتوب على اللوحه…
وهذي السياره الوحيده الموجوده بالمكان غير سيارتنا، ونفس الشي بالنسبه حق كل مكان في الجبال، الظاهر إن الناس يفضلون يروحون بالشتا…
طبعا أكبر متعه هي الخضره وصوت الطيور واستنشاق هوا الجبل، وهذا فيديو للمكان…
وفي نفس المكان أكو مسجد مبني من الخشب بنوه الجنود المسلمين ضمن وحدات الجيش البوسني أثناء الحرب وبدأ بناءه سنة 1993
Mount Igman Mosque
دخلنا المسجد نصلي، المسجد صج متواضع ولكنه نظيف ومبين مهتمين فيه…
ركبنا السياره وكملنا طريجنا لجبل بيالاشنيتا
يا حلو منظر الثلج على قمم الجبال!
وهذي صوره قبل لا ننزل المنحدر…
وصلنا! هالجبل مشهور بأن فيه أحد أفضل المنحدرات الثلجيه لمنطقة جنوب شرق أوروبا واللي تستقطب السياح في الشتا
هني أقيمت الألعاب الاولمبيه الشتويه سنة 1984
المكان فعلا يبيله زياره بالشتا!
كملنا طريقنا في هذا الجبل وحتى وحنا بالسياره مستمتعين بالمناظر الحلوه…
وقفنا بالطريج نشرب ماي
حده كان بااارد ومنعش!
طليت بالمنحدر قبل لا أركب السياره وحسيت ودي أتمسك بالشجر وأنزل! 😛
زادت الغيوم بالمكان وتبين أكثر بقمم الجبال، منظرها عجيب ماشالله!
وهذي صوره أقرب
والأحلى لما كملنا صعود الجبال بالسياره ودخلنا بالغيوم، وهذا فيديو
في قرى قديمه كثيره منتشره بالجبال لا زالت مأهوله، نزلنا عند أكثر من قريه نتمشى شوي وهذي بعض الصور…
الله يهنيهم بهالطبيعه ماشالله
وآخر مكان رحناله بالجبال هو مثل استراحه…
صفطنا وصعدنا مشي للمكان…
وناسه عندهم خيل!
يحليلهم بانين مسجد يمهم بعد…
شنو هالمكان العجيييب ماشالله حسيت إني في بيت يد هايدي لول
وصلنا المدخل…
المكان كله مبني من الخشب والأحجار
أصحاب المكان ساكنين فيه، ورحبوا فينا لما دخلنا…
قعدنا على الكراسي وطلبنا شاي…
وعلى ما اييبونه قمت أخذتلي جوله بالمكان…
حسيت إني بمكان وقف الزمن فيه! كل شي قديييم وماكو أي ملامح للحضاره والتطور وهذا اللي يميزه الصراحه
التفاصيل الصغيره والأدوات المعلقه هذي والمنتشره بالمكان محليته أكثر وأكثر!
هالأكشاك الخشبيه أتوقع للتأجير من جذي حاطين عليها أرقام…
وصلنا عند كوخ مكتوب عليه كلمه بالبوسني قالنا السايق معناها “بيت الجده”! قلتله شنو قصتها؟ قال جدة صاحب المكان توفت وهذي غرفتها مخلينها مثل ما كانت بأثاثها وكل شي فيها… اشتطيت حدي وطلبت أدخل أشوفها إذا يسمحولنا وفعلنا دخلناها وهذي صور للغرفه…
كل شي قديييم!
أهم شي تلفزيون فيليبس
خلص الشاي وطلعنا نشربه
شاي أعشاب
هالحشره ناشبتنا شوي! غيرت العدسه وقعدت أصورها 😛
وانتهت رحلتنا للجبال واللي استمتعت فيها وايد الحمدلله 🙂
وهذا رابط من مدونة AmaTraveler لرحلتها لجبل بيالاشنيتا بالشتا
{رابط}
